သမ္မတဦးသိန်းစိန် အော်စလိုမှာ မြန်မာတွေနဲ့ တွေ့ဆုံစကားပြောတယ်။ သူ့အရင် ဒေါ်အောင်ဆန်းစုကြည်လည်း မြန်မာတွေနဲ့စကားပြောတယ်။ ကိုမင်းကိုနိုင်လည်းပြောတယ်။ သမတနဲ့ သူတို့ မတူတာကဒေါ်အောင်ဆန်းစုကြည်နဲ့ ကိုမင်းကိုနိုင် တို့က ပိရိသတ်နဲ့ အမေးအဖြေ လုပ်တယ်။ တိုက်ရိုက်ခံစားချက်တွေအသံတွေနားထောင်တယ်။ ဒေါ်အောင်ဆန်းစုကြည် လည်း သူ့ရဲ့ ပြည်ပခရီးစဉ်တိုင်း အချိန်လုပြီးတွေ့တယ်၊ မေးခွန်းတွေဖြေတယ်။ ကိုမင်းကိုနိုင်ဆို ကျန်းမာရေးမကောင်းတဲ့ကြား၊ အိပ်ရေးပျက်ပြီးပင်ပမ်းတဲ့ကြားက တတ်နိုင်သလောက် မြန်မာမိသားစုတွေကိုလိုက်လျောတယ်။ သမတဦးသိန်းစိန်ကတော့ ၁၀မိနစ်နီးပါး သူပြောချင်တာပြောပြီး ဘာမေးခွန်းမှ မေးခွင့်မပေးပဲ ထွက်သွားတယ်။ ခေါင်းဆောင်တွေ အလုပ်များတာကျနော်တို့ သဘောပေါက်တယ်။ မူလက သမတနဲ့ တွေ့ရမဲ့အချိန်က ညနေ ၄နာရီခွဲ။သမတကိုတွေ့ဖို့မြန်မာတွေ၁၀၀ကျော်က ညနေ ၃နာရီကတည်းက လုံခြုံရေးရဲ ၃ဆင့်နဲ့ အစစ်ဆေးခံပြီး ထိုင်စောင့်နေကြတာ။
သူနဲ့တွေ့ဖို့ ၊မေးခွန်းထုတ်ဖို့ နော်ဝေးနိုင်ငံမြို့ အနှံ့က မြန်မာတိုင်းရင်းသားတွေရော ကျနော်တို့လို ၈လေးလုံးကျောင်းသားဟောင်းတွေရောလာကြတာ။ ဒါပေမဲ့ ကျနော်တို့သမတက သတ္တိမရှိဖူး။ သမတတင်မကဖူး သမတနဲ့ပါလာတဲ့ ၀န်ကြီးတွေလည်းအတူတူပဲ။ သတင်းသမားတွေလည်းအတူတူပဲ။ ၀န်ကြီးဦးစိုးသိန်းက တနာရီနီးပါးကြာ သူပြောချင်ရာကိုစစ်သားဘ၀တုံးက စက်သေနတ်နဲ့ပစ်နေသလို ဒလစပ်ပစ်နေတယ်။ အခမ်းအနားမှုးကတားတာလည်းမမှုဖူး(ဘယ်မှုမလဲ အခမ်းအနားမှုးက သူ့တို့ကို ကပ်ဖားပြီးအောက်ကျုံ့ဆက်ဆံနေရတဲ့ DVBက ကိုခင်မောင်ဝင်းလေ၊ အဲဒီသမတနဲ့တွေ့တဲ့ အခန်းမှာပဲ တချိန်တုံးက NCGUBညွန့်ပေါင်းအစိုးရခေါင်းဆောင်တွေ၊ NCUBအဖွဲ့တို့နဲ့ အာဏာရှင်တွေကို ဘယ်နည်း ဘယ်ပုံ တိုက်ကြမဟဲ့ဆိုပြီး ပါးစပ်ကအမြှုတ်ထွက်အောင် ပြောဟောခဲ့တာကို ကိုခင်မောင်ဝင်းကိုယ်တိုင် Videoရိုက် အင်တာဗျူးလုပ် ၀ါဒဖြန့်ခဲ့သေးတယ်။ ပုလင်းတူဗူးဆို့ခဲ့ကြသေးတယ်- စကားချပ်) ၀န်ကြီးဦးစိုးသိန်းအာတာကို နားထောင်နေရတဲ့ ပရိဿတ်က စိတ်ပျက်နေပြီ။ မျက်နှာတွေရှုံ့နေပြီ။ ဘယ့်နှယ် အစိုးရကို မေးခွန်းထုတ်ဖို့လာတာ သူတို့ တရားဟောတာနားထောင်ဖို့လာတာကျနေတာပဲတဲ့။ ပွစိပွစိပြောကုန်ပြီ။ ဒီတော့ အများပြည်သူအသံကို အမြဲဂရုစိုက်လေးစားတဲ့ အနေနဲ့ သတင်းထောက် ကျနော်လည်းအသံကျယ်ကျယ်နဲ့ ထပြောလိုက်တယ်။“၀န်ကြီး..သိတ်ပွားတယ်”လို့ သူက “ဗျာ..ဘာပြောတယ်” သူမရှင်းလို့ ကျနော် လက်ဟန်နဲ့ပါ ရှင်းအောင်ပြောတယ်။ဘယ်လက်ချောင်းတွေကို စုလိုက် ကျဲလိုက် (ပွစိပွစိလက်ဟန်) လုပ်ပြပြီး “၀န်ကြီးသိတ်ပွားတယ်လို့ပြောတာပါ။ မေးခွန်းမေးမဲ့လူတွေအများကြီးရှိသေးတယ်”လို့ ပြောတော့ မျက်နှာပျက်ပြီး မေးကြပါ၊ကျနော် ညနေအထိထိုင်စောင့်မယ်လို့ပြန်ပြောတယ်။တကယ်တော့ အခန်းဌားတာ ၆နာရီဆို အချိန်ပြည့်ပြီ။ တကယ့်အရေးကြီးတဲ့ မေးခွန်းတွေမမေးလိုက်ရဖူး။ လူတော်တော်များများမကြေမနပ်။ အားလုံးက သဘောပေါက်တယ်။ ၀န်ကြီးအဖွဲ့ အချိန်ကုန်အောင် အာ သွားတယ်ဆိုတာ။ ကျနော်တို့နိုင်ငံက ခေါင်းဆောင်လုပ်နေသူတွေက သတ္တိမရှိဖူး။ ပြည်သူတွေက မအူပင် မလက်တိုကျေးရွာ က လယ်သမားတွေ အကြမ်းဖက် ရိုက်နှက်ခံရတာ၊ သွေးထွက်သံယို ဖြစ်နေတာကို သမတသိအောင် ပြောပြချင်တယ်။ ပြန်ကြားရေးဒုတိယ၀န်ကြီးဦးရဲထွဋ် သတင်းထုတ်ပြန်တာ ကြားချင်တယ်။ ဒီမေးခွန်းတွေမေးဖို့ အဆင်သင့်ရှိတယ်။ ဒါပေမဲ့ မေးခွင့်မရကြဖူး။ တာဝန်ရှိသူတွေ သတ္တိမရှိဖူး။ အချိန်အကန့်အသတ်၊မေးခွန်းအကန့်အသတ်နဲ့ ပြီးသွားတယ်။သုတ်သုတ်လစ်သွားတယ်။ သူတို့လားဆိုတော့ မဟုတ်သေးဖူး။ သမတခရီးစဉ်မှာလိုက်ပါလာတဲ့ မီဒီယာတွေရောပဲ။ သမတကို ကျနော်တို့ဆန္ဒပြတာကို စကိုင်းနက်၊MRTV နဲ့ ပြန်ကြားရေးဝန်ကြီးသတင်းအဖွဲ့ တွေက ဓာတ်ပုံရော၊ ဗွီဒီယိုရော၊အင်တာဗျူးတွေရော လုပ်တယ်။ သမတ နဲ့ မြန်မာတွေ တွေ့ဆုံပွဲကိုလည်း အင်တာဗျုး တွေလုပ် တယ်။ ဒါပေမဲ့ လွှင့်တာတော့မှုတ်ဖူး။ “ကျနော်တို့ လူကြီးတွေ သဘောအတိုင်းပဲလုပ်ရတာပါ၊ အကိုတို့သတင်းတွေမလွှင့်ဖြစ်ပါဖူး၊ မှတ်တမ်းအနေနဲ့ ယူထားတာပါ” လို့ ကျနော့်ကို သူတို့ မီဒီယာ အဖွဲ့ဝင် တယောက်က ပြောတယ်။ တကယ်တော့ သမတကို ဆန္ဒပြသတင်းတွေ၊ အစိုးရအပေါ် အမြင်သဘောထားတွေကို မီဒီယာတွေက တဆင့် အစိုးရရော ပြည်သူတွေကိုပါ အသိပေးဖို့လိုတယ်။ အခုတော့ တဖက်လှည့် အင်တာဗျူးလုပ်၊ နားလှည့်ပါးလှည့်နဲ့ သတင်းဌာနအမည်ခံပြီး အဲဒီသတင်းကို စိတ်ဝင်စားတဲ့ ပြည်သူတွေကိုအသိ မပေးရဲတာဟာ ရှက်စရာကောင်းတယ်။ အစိုးရလက်ကိုင်တုတ်သတင်းဌာန တွေမို့ သတင်းမှန်ကိုပြည်သူတွေဆီပေးရဲမှာလည်းမဟုတ်ဖူး။ ရီစရာတခုပြောရမယ်။ ၀န်ကြီးဦးစိုးသိန်း အမေးအဖြေ အစီအစဉ်တွေပြီးသွားတော့ လူတော်တော်များများပြန်သွားတဲ့ အချိန် ၀န်ကြီးက သူတို့နဲ့ ပါလာတဲ့ သတင်းမီဒီယာတွေကို “မင်းတို့ သေချာတည်းဖြတ်ပြီး မှလွှင့်နော်၊ ပြောတာတွေအကုန်မထည့်နဲ့၊ အကုန်ဒုက္ခရောက်ကုန်မယ်” ဆိုပြီးပြောတာ ကျနော့ နားနဲ့ဆတ်ဆတ်ကိုကြားခဲ့ ရတာ။ အနားမှာရှိနေတဲ့ ကျနော်ကတောင် “ကျနော်က တည်းဖြတ်ပြီးလုပ်ရမှာလား”လို့ လှမ်းမေးလိုက်တော့ ၀န်ကြီးက မျက်နှာတည်တည်နဲ့ “ ကျနော် သူတို့ကို ပြောနေတာပါ ” လို့ ပြန်ပြောတယ်။ ဒါဆိုရှင်းနေတာပဲ။ ပြည်တွင်း မီဒီယာတွေဟာ သတင်းကို သတင်းအတိုင်း အစိုးရဘက်ကို မလိုက်ပဲ တိတိကျကျမှန်မှန်ကန်ကန် လုပ်ရဲသလား၊ မလုပ်ရဲဖူးလား၊ အဖြေက ရှင်းတယ်။ အစိုးရက သတင်းမီဒီယာတွေကို ချုပ်ကိုင်ထားတယ်။ ကျနော်တို့ဆန္ဒပြသတင်းလည်း သူတို့ မကောင်းတာ ၀ါဒဖြန့်ချင်ရင် ထုတ်သုံးလိမ့်မယ်။ နိုင်ရင်ဖိထောင်းလိမ့်မယ်။
ဆန္ဒပြတုံးက သူတို့မီဒီယာတွေ မေးတဲ့ မေးခွန်းတခုကို ကျနော်ဖြေနေရင်း ထည်ံပြောလိုက်တာတခုရှိတယ်။ “ ပြည်သူတွေရပိုင်ခွင့်က တကျပ်ဖိုးဆို တကျပ်ဖိုးပေးပါ။ တမတ်ဖိုး၊ပေးလိုက် ငါးမူးဖိုးပေးလိုက်နဲ့ ဒီမိုကရေစီကို ပြန်ပေးမဆွဲထားနဲ့၊ ရေကူးတတ်ချင်တဲ့လူကို ရေနစ်မှာစိုးလို့ ရေထဲမဆင်းခိုင်း ရင် ရေကူးတတ်မှာမဟုတ်ဖူး၊ ဒီမိုကရေစီနိုင်ငံလုပ်မယ်ဆို သတ္တိရှိရှိလုပ်ပါ ကျနော်တို့ အားပေးမယ်” လို့ပြောခဲ့တယ်။တကယ်ဆို ကျနော်တို့ မြန်မာလူထုဟာ မရိုင်းဖူး၊ ဒီမိုကရေစီ စနစ်သာကျင့်သုံးခွင့်မရသာ ဘာကိုမလုပ်သင့်ဖူး၊ ဘာကိုလုပ်သင့်တယ်ဆိုတာ ခွဲခြားသိတယ်။ ဘာသာတရားအဆုံးအမတွေမှာ ဒီမိုကရေစီ ကျင့်ထုံးတွေပါပြီးသား။ အစိုးရသာ ဒီမိုကရေစီ တန်ဘိုးကို နားမလည်သေးတာ ပြည်သူလူထုက ဒီမိုကရေစီအနှစ်သာရကို သဘောပေါက်ပြီးသား။ ကျနော်တို့ပြည်သူက မ“အ”ဖူး။ အစိုးရက “အ”နေတာ။ ကျနော်တို့ပြည်သူက ဒီမိုကရေစီလမ်းပေါ်စလျှောက်နေပြီ။ နောက်ပြန်လျှောက်မှာမှုတ်ဖူး၊ ခေတ်ပြောင်းပြီဆိုတာနဲ့ မိမိတို့ လုပ်ရမဲ့ အလုပ်တွေကို သတ္တိရှိရှိလုပ်နေကြတယ်။ အစိုးရက ပြောပြီး တွန့်ဆုတ်ဆုတ်ဖြစ်နေတယ်။ နောက်ပြန်ရောက်နိုင်တယ်လို့ ခြိမ်းခြောက်နေပြန်တယ်။ ဘာမှ သတ္တိရှိရှိ မလုပ်ရဲဖူး။ အကြောက်တရားလွမ်းမိုးတုံး၊ လူထုနဲ့ အတိုက်အခံကို မယုံကြည်တုံး။ ဒီပုံစံနဲ့ မိုးကြီးချုပ်လိမ့်မယ် သမတကြီး။ ဒီမိုကရေစီဖြစ်လာမှာမဟုတ်ဖူး။ ခရိုနီတွေပဲ အလုပ်ဖြစ်သွားမှာ။ သမတကြီးလည်နေတဲ့ ဥရောပ နိုင်ငံတွေက သိတ်လည်တယ်။ သမတကြီးက အခုမှ ဥရောပ ၅နိုင်ငံရောက်တာ သူတို့က တကမ္ဘာလုံးကပထ၀ီမြေပုံတွေကို အပ်ကြောင်းထပ်နေအောင် လိုက်ကြည့်ပြီးပြီ။ သူတို့လိုချင်တာ သူတို့ ပြည်သူတွေ ကိစ္စက ပထမတန်းပဲ။ ကျနော်တို့သမတကြီးက ဘယ်သူ့အတွက် ပထမတန်းဦးစားပေးမလဲ? သမတကြီးရဲ့ ပါတီအတွက်လား? သမတကြီးရဲ့ အစိုးရအတွက်လား? သမတကြီးရဲ့ တပ်မှုးတွေအတွက်လား? ဒါမှမဟုတ် မြန်မာပြည်သူတွေအားလုံး တိုးတက်ဖွံ့ဖြိုးရေးအတွက်လား? မြန်မာ ပြည်သူတွေအတွက် သက်သက်လုပ်မယ်ဆို သမတကြီး သတ္တိရှိဖို့လိုတယ်။ သမတကြီးသတ္တိမွေးပါ။စစ်သားတယောက်လို လက်နက်ကိုင်ပြီး အာကျယ်တဲ့ သတ္တိ မလိုချင်ဖူး။ ပြည်သူတွေက အဲဒီ အာဏာရှင်စိတ်နဲ့ အာကျယ် တွေကို အနိုင်ယူနိုင်တဲ့ သတ္တိမျိုးပဲ သမတကြီးမှာဆီမှာ မြင်ချင်ကြတယ်။ ဒီတော့ သမတကြီးသတ္တိရှိပါ။ ၀န်ကြီးတွေ သတ္တိရှိပါ။ လွှတ်တော်လည်းသတ္တိရှိပါ။ ဒီမိုကရေစီကို မရှောင်ပါနဲ့ ၊ ပြည်သူတွေကို မကြောက်ပါနဲ့။ အစိုးရက သတ္တိရှိရှိ ဒီမိုကရေစီလမ်းကိုချဲ့ထွင်ပါ။ တိုးလျှောက်ပါ။ ခေါင်းဆောင်တွေသတ္တိရှိပါ။
ကိုညို( အော်စလို)
No comments :
Post a Comment
မင်္ဂလာပါ။ကျွန်တော်အတွက် အားတစ်ခုပေါ့။