ငချွတ်ကလေးများအား ကြိုးစားခွင့်ပြုပါ

ကျွန်မကို ၁၉၈၉ခုနှစ် အောက်တိုဘာ တစ်ရက်နေ့တွင် မွေးဖွားပါသည် ... ၈၈ အရေးအခင်းကို လူကိုယ်တိုင် မပြောနှင့် .. အမေ့ဗိုက်ထဲကပင် မမှီလိုက်ပါ ... ယခု နှစ် ၅၀ ပြည့်သော ကျောင်းသားသမဂ္ဂဖောက်ခွဲခံရတုန်းက ဆိုလျှင် ကျွန်မ အရင်ဘဝမှာပင် ရှိပါဦးမည် ... ၂၀၀၇ ခုနှစ် ရွှေဝါရောင် သံဃာတော်များ အရေးအခင်းတွင် ကျွန်မ 2nd M.B ရောက်ပါပြီ .... လူတွေစီတန်းဆန္ဒပြသည့် သတင်းများကို အစပထမ အင်တာနက် သတင်းများအရ သိရသည် ... နောက် ရေဒီယို နားထောင်၍ သိရသည် ... တကယ်လူအုပ်ကြီးကိုတော့ အနားတိုးလို့ ကပ်လို့ပင် မကြည့်ဖူးပါ ... ယခင့် ယခင် နိုင်ငံရေးသမိုင်းများတွင် မသိမှီလိုက်၍သော် လည်းကောင်း .... အသိဥာဏ်မရှိ၍သော်လည်းကောင်း ကျွန်မ ဘယ်နေရာမှ participate မလုပ်ဖူးပါ ( ပွင့်လင်းစွာ ဝန်ခံခြင်းဖြစ်ပါသည် )



သို့သော် ......

ယခု ကျွန်မတို့ လူငယ်တွေ နိုင်ငံရေးအကြောင်း ရေးတော့ ပြောတော့ ... " ၈၈ တုန်းက မွေးဖြင့် မမွေးသေးပဲနဲ့ အာကချောင်ချင်တယ်" " ကျောင်းသားသမဂ္ဂအကြောင်း ပြောရအောင် မှီလိုက်တာကျနေတာပဲ " " ရှေ့ထွက်ဆိုရင်တော့ ဘယ်တုန်းကမှ မပါပါပဲနဲ့ "

ဆိုတာ .. ဆိုတာတွေ ကြားလာရသည် ... တွေ့လာရသည် ...



၈၈ နောက်ပိုင်းမွေးလာကြသူများသည် မျက်စိမှိတ် နားပိတ်ကာ မွေးလာရသူများဖြစ်သည် ... ကျွန်မတို့ မွေးပြီး နဖူးတွေ့ဒူးတွေ့တွေ့လိုက်ရသော အစိုးရသည် မြန်မာနိုင်ငံကို ဂုတ်သွေးစုပ် အမြတ်ထုတ်ခဲ့သော ( ထုတ်နေသော ) စစ်အစိုးရဖြစ်ပါသည် ... စစ်အစိုးရ၏ သတင်းကောင်းများကိုတော့ အထူးတလှယ် ဇာချဲ့ပြောနေရန် လိုမည်မထင်ပါ .. နိုင်ငံရေးဆိုတာကို ပွင့်လင်းစွာ ရေးဖို့ပြောဖို့ မပြောနှင့် လေသံတောင် ရဲရဲ မဟရဲအောင် ဖိနှိပ်ထားခဲ့သော အစိုးရဖြစ်ပါသည် ... ဒီတော့ ကျွန်မတို့ ကလေးတုန်းက ဘာတွေ သိခဲ့မည်နည်း ... ဘယ်သူမှလည်းနိုင်ငံရေးအကြောင်းမပြောပါ ... ဘယ်စာအုပ်ကမှလည်း နိုင်ငံရေးအကြောင်းမရေးပါ .. ကျွန်မတို့လည်း ဘာမှ မသိခဲ့ပါ ...



ကျွန်မအတွက် နိုင်ငံရေးဆိုသည်မှာ စက်ဆုပ်ဖွယ်ကောင်းသောအရာလား ... ဂုဏ်ယူဖွယ်ကောင်းသောအရာလား ဆိုတာ ဝေခွဲရခက်ခဲ့ပါသည် ... ဟိုးငယ်ငယ် ကျောင်းသူဘဝက ဂျပန်ကို ပညာတော်သင်သွားဖို့ စာမေးပွဲဖြေရမည်ဆိုတော့ ကျောင်းသားခေါင်းဆောင် သမီးဖြစ်၍ ရွေးချယ်ခံရပြီးမှ ပြန်နှုတ်ခံရသည် .. ကျွန်မ ယနေ့တိုင် မမေ့သေးပါ ... သိပ်စိတ်နာပါသည် .... အဲ့ဒီတုန်းကတော့ နိုင်ငံရေးဆိုတာကြီးကို မုန်းခဲ့ပါသည် ...



ကိုးတန်းတုန်းက သူများအဖေတွေထောင်က လွတ်တာမြင်တော့ ဖေဖေ့ကို ခံဝန်လက်မှတ်ရေးထိုးဖို့ ကျွန်မ ထောင်ဝင်စာတွေ့ရင်း ငိုယိုတောင်းပန်ခဲ့ဖူးသည် .... ဖေဖေက " သမီးကြီးရင် နားလည်လာပါလိမ့်မယ် " ဟု ပြောလွှတ်လိုက်သည် ... အခုပြန်တွေးကြည့်တိုင်း ငိုခဲ့တာကို ရှက်မိပါသည် ....



ကျွန်မနိုင်ငံရေးကို စက်ဆုပ်ခဲ့ပါသည် ... ကျွန်မနိုင်ငံရေးလုပ်ရမှာကို ကြောက်ခဲ့မိပါသည် ... နိုင်ငံရေးဆိုတာ ကျွန်မအတွက်တော့ မိသားစု တကွဲတပြားနေရခြင်းထက် ဘာမှ မပိုခဲ့ပါ .... ဟု ထင်ခဲ့မိပါသည် ...



ကိုယ်ပိုင် အသိဥာဏ်ဖြင့် ကိုယ်တိုင် ရပ်တည်လာနိုင်ချိန်တွင်တော့ အရင်က အတွေးတွေကို ပြန် စက်ဆုပ်လာပြန်ပါပြီ ... အန်တီစုက " အမျိုးသမီးတွေ အိမ်မှာ ထမင်းချက်တာလည်း နိုင်ငံရေး လုပ်တာပဲ " ဟု အကျယ်ချုပ်မှ ပြန်လွတ်လာခါစက ပြောဖူးပါသည် ...



ကျွန်မ ကြီးကြီးကျယ်ကျယ် နိုင်ငံရေးမလုပ်လိုပါ ...

သို့သော် တတ်စွမ်းသမျှလေးတော့ ပါဝင်ပါရစေ

ကျွန်မတို့အားလုံး နိုင်ငံ့အရေး နိုင်ငံရေးကို လေ့လာနေဆဲ ဖြစ်ပါသည်...

သမိုင်းကို မမှီလိုက်တိုင်း နိုင်ငံရေးပြောခွင့် မရှိဘူးတဲ့လား ????

ကျွန်မတို့ မမှီလိုက်သော်လည်း မှီလိုက်သူများထံမှ လေ့လာပါရစေ

နိုင်ငံအတွက် ကြိုးစားပါရစေ

ယခင်က မပါဝင်ခဲ့ဖူးသော်လည်း ယခုတော့ ပါဝင်ပါရစေ ....

ကျောင်းသားသမဂ္ဂဖောက်ခွဲခံရတုန်းက မမွေးသေးသော်လည်း 7 July ကို သမိုင်းမှတ်တမ်းတွေကနေ တဆင့် ပြန်လည် အမှတ်ရပါရစေ ...

ဗိုလ်ချုပ်အောင်ဆန်းကို ကိုယ်တိုင် ကိုယ်ကျ မမြင်ဖူးပေမဲ့ အာဇာနည်နေ့နဲ့ ဗိုလ်ချုပ်မွေးနေ့တွေမှာတော့ ဗိုလ်ချုပ်အတွက် လုပ်နိုင်တာလေးတွေ လုပ်ပေးပါရစေ

ဆလိုင်းတင်မောင်ဦးဆိုတာ ခုမှကြားဖူးပေမဲ့ သူ့ပေးဆပ်မှုအတွက် ဂုဏ်ပြုပါရစေ



" မသိပဲနဲ့ ဝင်မပြောနဲ့

မကြုံဖူးရင် လျှာဝင်မရှည်နဲ့ " ... ဆိုပြီး အညွှန့်မချိုးလိုက်ပါနဲ့

၈၈ နောက်ပိုင်းမွေးတဲ့ ငချွတ်လေးများဟာလည်း နောင်တစ်ချိန် လူကြီးဖြစ်လာမဲ့သူတွေချည်းပါပဲ



ငချွတ်ကလေးများလည်း စွမ်းသလောက်တော့ ကြိုးစားပါရစေလို့ ပန်ကြားရင်း





ကျေးဇူးတင်လျက်

အိမွန်သင်းကြူ